क्राईम टुडे न्यूज – शेतात जात असलेल्या बैलगाडीला भरधाव कारने जोरदार धडक दिल्याने बैलगाडीवरील शेतकऱ्याच्या पायाला गंभीर दुखापत झाल्याची घटना धरणगाव तालुक्यातील निंभोरा ते खामखेडा रस्त्यावर घडली आहे. याप्रकरणी शुक्रवारी १७ नोव्हेंबर रोजी रात्री साडेनऊ वाजता अज्ञात कारचालकावर धरणगाव पोलीस ठाण्यात गुन्हा दाखल करण्यात आला आहे.
सूत्रांकडून मिळालेली माहिती अशी की, काशिनाथ ओंकार पाटील (वय-५५) रा. निंभोरा ता. धरणगाव हे आपले परिवारासह वास्तव्याला असून शेतीचे काम करून आपला उदरनिर्वाह करतात. ३ नोव्हेंबर रोजी दुपारी साडेतीन वाजता काशिनाथ पाटील हे निंभोरा ते खामखेडा दरम्यानच्या रस्त्यावरून बैलगाडीने शेतात जात होते. त्यावेळी मागून भरधाव वेगाने येणाऱ्या अज्ञात कारने त्यांच्या बैलगाडीला जोरदार धडक दिली. या अपघातात काशिनाथ पाटील हे बैलगाडीवरून खाली पडले व त्यांच्या पायाला गंभीर दुखापत झाली. दरम्यान अपघात घडल्यानंतर कारचालक हा कार घेऊन पसार झाला होता. जखमी झालेले शेतकरी काशिनाथ पाटील यांच्यावर खाजगी रुग्णालयात उपचार करण्यात आले. उपचार घेतल्यानंतर शुक्रवारी १७ नोव्हेंबर रोजी रात्री नऊ वाजता काशिनाथ पाटील यांनी दिलेल्या फिर्यादीवरून धरणगाव पोलीस ठाण्यात अज्ञात कार चालकाविरोधात गुन्हा दाखल करण्यात आला आहे.
