चाळीसगाव प्रतिनिधी । दोन वर्षांसाठी जळगाव जिल्ह्यातून हद्दपार असलेल्या अट्टल गुन्हेगाराला चाळीसगाव बसस्थानक आवारातून अटक केली आहे. शहर पोलीसांनी सापळा रचून त्याला अटक केली आहे. शहर पोलीस ठाण्यात गुन्हा दाखल करण्यात आलाय. अक्षय भानुदास पाटील (वय-२५) रा. लक्ष्मीनगर,चाळीसगाव असे अटक केलेल्या गुन्हेगाराचे नाव आहे.
शहरातील लक्ष्मीनगर येथील अक्षय पाटील या तरुणाला उपविभागीय पोलीस अधिकारी यांचे आदेश क्रमांक ०३/२०२० दि. २८ जूलै २०२१ अन्वये त्याच्यावर दाखल गंभीर गुन्ह्यात दोन वर्षासाठी जिल्ह्यातून हद्दपार करण्यात आला होता. मात्र सदर इसम २ जानेवारी रोजी सकाळी ९ वाजेच्या सुमारास चाळीसगाव बस स्थानकाच्या पाठीमागील एका पान टपरीच्या आडोशाला फिरत असल्याची गुप्त माहिती शहर पोलिसांना मिळाली. त्यावर पोलिसांनी सापळा रचून त्याला ताब्यात घेण्याचा प्रयत्न केला. तेव्हा आरोपीने पोलिसांशी हुज्जत घातली. तुम्हाला जे करायचा ते करून घ्या. मी पोलीस स्थानकाला येणार नाही. असे सांगून पसार होण्याचा प्रयत्न केला. परंतु अधिक पोलिस बळ बोलावून त्याला ताब्यात घेतले. व पोकॉ दिपक चौधरी यांच्या फिर्यादीवरून चाळीसगाव शहर पोलिस स्थानकात गुन्हा दाखल केलाय.
