नाशिक (क्राईम टूडे टीम) । दिंडोरी तालुक्यातील वलखेड फाट्यावर कारला अचानक आग लागल्याची घटना बुधवारी दुपारी घडली आहे. दिंडोरी परिसरात बर्निंग कारचा थरार पाहायला मिळाला आहे.
या बाबतची मिळालेली अधिक माहिती अशी की, दिंडोरी तालुक्यातील वलखेड फाट्यावर एका चालत्या कारला आग लागली आणि बघता बघता संपूर्ण कार आगीच्या लपेट्यात सापडली . आजच्या दिवसात वाहनाला आग लागल्याची ही दुसरी घटना घडली आहे. या घटनेत संपूर्ण कार जळून खाक झाली आहे. आगीचे कारण अद्याप समजू शकलेले नाही. कार मध्ये असलेले व्यक्ती तात्काळ बाहेर पडल्याने सुदैवाने मोठा अनर्थ टळला आहे.
इंडिका गाडीला अचानक आग लागल्याने गाडीत असलेले प्रवाशी घाबरले होते. मात्र यावेळी मोठ्या शिताफीने हे सर्व प्रवासी वाहनातून बाहेर निघाल्याने मोठी दुर्घटना टळली आहे. रस्त्यावरच या कारने पेट घेतल्याने त्या ठिकाणहून ये-जा करणाऱ्यांना देखील धोका निर्माण झाला होता. दरम्यान स्थानिकांनी ट्रॅक्टर टँकरने आग विझविण्याचा प्रयत्न केल्यानंतर आग आटोक्यात आली. मात्र बर्निंग कारच्या या थरारामुळे रस्त्यावरची वाहतूक काही काल खोळंबली होती.
